නාවික හමුදාවේ මාස තුනක පුහුණුව පැවතියේ ත්‍රිකුණාමලයේ නාවික හා සමුද්‍රයීය විද්‍යා පීඨයේදී. එය කෙටියෙන් හැඳින් වූයේ NMA නමින්. (එයින් කියැවුණේ Naval and Maritime Academy යන්නෙහි මුල’කුරුයි.)

NMA හි විවිධ පාසල් පැවැත්වුණා. අප අනුයුක්ත වූයේ ඉංජිනේරු පාසලටයි. ඉංජිනේරු පාසල ප්‍රධාන වශයෙන් නාවික ඉංජිනේරු (Marine Engineering) අධ්‍යාපනය ලබා දීම මූලික කොට ගත්තා. ඊට අමතරව විදුලි ඉංජිනේරු (Electrical Engineering) පාසල, සන්නිවේදන (Communication) පාසල, ගනරි (Gunnery) පාසල යනාදී වශයෙන් විවිධ අංශ සඳහා පාසල් වෙන් වී තිබුණා.

පුහුණු වන වෙඩි පිටිය (Firing range) පිහිටියේ තරමක් දුරින් මුහුද අද්දර කැළෑවේයි. සරඹ හා පෙළපාළි පුහුණු වීම (Drill and Parade) සඳහා පෙරේඩ් ග්‍රවුන්ඩ් (Perade Ground) නමින් වූ පිටිය පිහිටියේ නාවික හා සමුද්‍රයීය විද්‍යා පීඨයේ එක් කෙළවරකයි.

දිනපතා උදෑසන ශරීර සුවතා (Physical Training – PT) හි යෙදෙන්නට  ඒ සඳහා නියමිත වූ සුදු කොට කලිසම, සුදු ටී ෂර්ට් එක, සුදු කැන්වස් සපත්තු පැලඳ ගෙන උදේ පාන්දරින් අවදි වී සැතපුම් කිහිපයක් දිව යමින් දවස ආරම්භ කළ අපි, එම කාර්යය  අවසන් කළේ අවි ගබඩාව (Armoury) ඉදිරි පිට පෙළ ගැසෙමිනුයි. පමාවී පැමිණියේ නම් හෝ අතර මගදී හොරට පී.ටී. (PT) කර අසු වූයේ නම් දඬුවම් ලෙස තුවක්කු දෑතින් ඔසවාගෙන එහා මෙහා දිවීමේ දඬුවමට යටත් වන්නට සිදු වුණා.

අනතුරුව නේවාසික නිවස්නය වෙත යන අපට මුහුණ දොවා උදේ ආහාර ගෙන පුහුණු වන නිලධාරීන් සඳහා වූ ඇඳුම් හැඳගෙන පෙරේඩ් ග්‍රවුන්ඩ් (Perade Ground) වෙත යන්නට ඉතිරි වුණේ ඉතා කෙටි කාලයක්.

එසේම දිවා ආහාරය සඳහා ද ලැබුණේ නිශ්චිත කෙටි කාලයක්. සවස ඉංජිනේරු පාසලේ හා ප්‍රයෝගික ක්‍රියාකාරකම් අවසානයේ නිවස්නයට පැමිණ තේ පානය කොට ඒ හාම ක්‍රීඩා කටයුතු වලට සහභාගී වීම සඳහා ක්‍රීඩා පිටියට යා යුතු වුණා. ඇඳිරි වැටෙන විට ආපසු පැමිණ කාමර අස්පස් කොට, බූට් සපත්තු පොලිෂ් කොට, ඇඳුම් මැද රාත්‍රියේ කාර්යභාර නිලධාරියාගේ නිරීක්ෂණ සඳහා සුදානම් විය යුතු වුණා. ඒ නිරීක්ෂණ වලදී වඩාත් අවධානයට ගත්තේ පිරිසිදු කම, සපත්තු මුහුණ පෙනෙන පරිදි පොලිෂ් කර තිබීම, හා පිළිවළට වැඩ කටයුතු කිරීමයි. පිළිවෙළ යන්න කොතරම් සියුම් ලෙස නිරීක්ෂණය කළේද යත් නිදන ඇඳේ බෙඩ් ෂීට් එකක රැල්ලක් හෝ තිබුණොත් දඬුවම් හිමි උණා. පිරිසිදුකම කොතරම් සියුම්ව නිරීක්ෂණය කළේ ද යත් ජනෙල් කවුළුවක් ඇඟිලි තුඩින් අල්ලා දූවිලි බිඳක් සොයා ගත්තොත් දඬුවම් හිමි වුණා.

මේ හැම දෙයක් මගින්ම නිසි වේලාවට වැඩ කිරීමටත්, ඉතා පිරිසිදුව හා ක්‍රමවත්ව දෛනික ජීවිතය පවත්වා ගෙන යාමටත් අපව හුරු කළා. (අද දක්වාම නිදන ඇඳේ රැලි ඇත්නම් ඒවා සකසන්නටත්, පොරවන රෙදි, සරම ගුලි නොකොට නමා තබන්නටත් මා පුරුදුව සිටින්නේ මේ පුහුණු කිරීමේ ප්‍රතිඵල ලෙසයි.) 

උදේ පෙරඩ් ග්‍රවුන්ඩ් එකට ගිය පසු පැයක් පමණ සරඹ හා පෙළපාළි පුහුණු කළා. විශේෂයෙන්ම විසිර යාමේ පෙළපාළිය සඳහා පියවර තබන හැටි, කඩුව රඳවා ගන්නා හැටි, ආචාර පවත්වන හැටි යනාදී සියල්ල පුහුණු කළේ ප්‍රධාන පුහුණු නිලධාරී රත්නතුංගයි. G.I. රත්නතුංග (Gunnery Instructor) යනු ඉතා දැඩි දඬුවම් දෙමින් වැරදි නිවැරදි කළ ප්‍රධාන සුළු නිලධාරියායි. (Chief Petty Officer). සුළු අතපසු වීමකට දඩුවම වුණේ දෑතින් T – 56  මැෂින්ගන් දෙකක් හෝ A K 47 රයිෆලය ඔසවා ගෙන පිට්ටනිය වටා රවුම් 10-15-20 යනාදී ලෙස දිවීම ඇතුළු දඬුවම්.

අප පුහුණු වුණේ කාන්තා නැවියන් සමඟ සමාන්තරව නිසා ඔවුන් බලා සිටිද්දී දඬුවම් විඳිනවා යනු පොළොව පළාගෙන යන්නට තරම් සිතෙන ලැජ්ජාකාරී අවස්ථාවක් වුණා. කිසියම් කාන්තා නැවියක අපට හිනා වුණේ නම් ඇයටද  ලබා දුන්නේ එවන්ම දඬුවමක්.

පෙරඩ් එකේදී අප නිල ඇඳුම හැඳ සිටින ආකාරය සුක්ෂමව නිරීක්ෂණය වුණා. නිල් පාට නිල ඇඳුම පුහුණු වීමේදී අඳින්නා සේම කාර්යාල කටයුතු වලට වෙන් කොට තිබුණේ සුදු ඇඳුමක්.

නිල් පැහැ නිල ඇඳුම සමන්විත වුණේ මේ ආකාරයටයි. නිල් පැහැ ඇත දිගු කමිසය, නිල් පැහැ දිගු කලිසම, නිල් බඳ පටිය, කළු බූට් සපත්තු (මැනවින් පොලිෂ් කළ යුතුයි.) සපත්තුවට පහළින් සුදු ඇන්ක්ලට් (Anklets)(එය කුණු නොතැවරෙන සේ නිතිපතා වර්ණ ගැන්විය යුතු වුණා.), බ්‍රාසෝ යොදා දිලිසෙන්නට පොලිෂ් කළ නිල ලාංඡනය රැගත් හිස් පළදනාව (Cap) හෝ (Beret), උරහිස් පළදනාව (epaulet) යි.

උරහිස් පළඳනාව මගිනුයි කිසියම් නිලධාරියෙකුගේ නිලය (Rank) හඳුනා ගත්තේ. උරහිස් පළඳනාවේ වූ හීන් පටි සංඛ්‍යාව අනුව නිලයත්, පටි අතර වර්ණය අනුව අයත් වන අංශයත් පිළිබිඹු වුණා.

උප ලුතිනන්ට එක පටියක්ද, ලුතිනන්ට පටි දෙකක්ද ආදී වශයෙන් වෙන් වුණා. අප අතර උප ලුතිනන්ලා මෙන්ම ලුතිනන්ලාද සිටියේ මා වැනි සමහරු උපාධිය සම්පුර්ණ නොකොට හමුදාවට බැදී සිටි නිසයි. උප ලුතිනන් ලෙස බඳවා ගත් උපාධි අපේක්ෂකයින් උපාධිය සම්පූර්ණ කළ පසු ලුතිනන් තනතුරට පත් කරන්නට නියමව සිටියා. 

(ඡායාරූපය 2)