Antoine Hercule Romuald Florence ඇන්ටොයින් හර්කියුලේ රොමුවාල්ඩ් ෆ්ලෝරන්ස් (හර්කියුලිස් ෆ්ලෝරන්ස් Hércules Florence) [උපත 1804 මාර්තු 27, නයිස්, ප්‍රංශය – විපත 1879, කැම්පිනස්, බ්‍රසීලය] යනු මොනාගාස්ක්-බ්‍රසීලියානු චිත්‍ර ශිල්පියෙකු සහ නව නිපැයුම්කරුවෙකි. ඔහු බ්‍රසීලයේ හුදෙකලා ඡායාරූප නව නිපැයුම්කරු ලෙස හැඳින්වේ. ෆ්ලෝරන්ස්ගේ සටහන් පරීක්ෂා කළ කොසෝයිට අනුව, තවමත් භාවිතයේ පවතින ජෝශප් නිසෆෝ නීප්සේගේ ධණ / ඍණ අනුකෘතියටත් වසර 6 කට පෙර සහ ඩැගියුරේ ක්‍රමයට වසර 3 කටත් පෙර, හර්කියුලස් ෆ්ලෝරන්ස් තම නිර්මාණ ක්‍රියාවලිය ඡායාරූපකරණය photographie නමින් හැඳින්වූයේය. ඒ 1834 දී ප්‍රංශයේදී ජෝන් හර්ෂල් විසින් ඡායාරූපකරණය යන ඉංග්‍රීසි වචනය නිල වශයෙන් ලොවට ඉදිරිපත් කරන්නටත් අවම වශයෙන් වසර හතරකට පෙරය.

හර්කියුලිස් ෆ්ලෝරන්ස් 1804 පෙබරවාරි 29 වන දින ප්‍රංශයේ නයිස් හි උපත ලැබීය. බදු එකතු කරන්නෙකු වූ ආර්නාඩ් ෆ්ලෝරන්ස් (1749-1807) සහ සුළු වංශවත් කාන්තාවක් වන ඔගස්ටින් ඩි විග්නොලිස්ගේ පුත්‍රයාය. කුඩා කාලයේ දී ඔහු චිත්‍ර ඇඳීමට හා විද්‍යාවට ඇළුම් කළ අතර, නව ලොව මහා ගවේෂකයන්ගේ මුහුදු ගමන් සඳහා උනන්දුවක් දැක්වූයේය. ඔහු සිය වයස 14 සපිරෙද්දී ම, මොනාකෝ හි අකුරු ලිවීමේ හා සැලසුම් ශිල්පියකු ලෙස නමක් දිනා සිටියේය.

ඉන්පසු යුධ නැව් සහ වෙළඳ නැව්වල ඉබාගාතේ යමින් හා වැඩ කිරීමෙන් පසු හර්කියුලිස් ෆ්ලෝරන්ස් මාරි තෙරෙස් ප්‍රංශ යුද නෞකාවේ කාර්ය මණ්ඩල සාමාජිකයෙකු ලෙස බ්‍රසීලයට යාත්‍රා කළ අතර 1824 මැයි 1 වන දින රියෝ ද ජැනෙයිරෝ වරායට පැමිණියේය. ඒ බ්‍රසීලය පෘතුගාලයෙන් නිදහස ලබා වසර දෙකකට පමණ පසුවය. ඔහු මේ වන විටත් සැලකිය යුතු දක්ෂතා සහ විද්‍යාත්මක අවශ්‍යතා රාශියක් ඇති දක්ෂ චිත්‍ර ශිල්පියෙකු විය. විශේෂයෙන් ඔහු ස්වාභාවික විද්‍යාවන් හා ජනවාර්ගික විද්‍යාව පිළිබඳ සොයන්නට ඇළුම් කළේය. ඔහු පැමිණි විගසම කාන්තා විලාසිතා සාප්පුවක රැකියාවක් ලබා ගත් අතර පසුව ඔහුගේ සගයා වූ පියරේ ප්ලැන්චර්ට අයත් පොත් සාප්පුවක හා මුද්‍රණාලයක ලිතෝග්‍රැෆික් ශිල්පියෙකු ලෙස රැකියාවක් ලබා ගත්තේය.‍

ජර්මානු ජාතික වෛද්‍යවරයෙක් සහ ස්වභාව විද්‍යාඥයෙකු ද වන, බ්‍රසීලයේ රුසියානු අධිරාජ්‍යයේ කොන්සල් ජෙනරාල් බාරොන් වොන් ලැන්ග්ස්ඩෝෆ් (1773–1852) විසින් රුසියානු අධිරාජ්‍යයා වෙනුවෙන් පළ කරන ලද පුවත්පත් දැන්වීමකට ප්‍රතිචාර දැක්වීමට තීරණය කළ අතර, එය ෆ්ලෝරන්ස්ගේ ජීවිතය නාටකාකාර ලෙස වෙනස් කළේය. එමගින් ඔහු ඇමසන් හි, විද්‍යාත්මක ගවේෂණයන් කරන ඉම්පීරියල් විද්‍යා ඇකඩමියට එකතු විය. ජර්මානු චිත්‍ර ශිල්පියකු වන ජොහාන් මොරිට්ස් රුජෙන්ඩාස් (1802–1858) සහ තරුණ ප්‍රංශ චිත්‍ර ශිල්පී ඇඩ්‍රියන් ටෝනායි (1803–1828) සමඟ ඔහු චිත්‍ර ශිල්පියෙකු හා භූ විෂමතා කෙටුම්පත් ශිල්පියෙකු ලෙස ඊට බඳවා ගන්නා ලදී. වර්ෂ 1825 දී ඔවුන් රියෝ සිට සැන්ටොස් ගම්මානය දක්වා මුහුදු මාර්ගයෙන් ගමන් කළෝ ය. එම ගමනේ ගවේෂණ චාරිකා සටහන් අවසානයේ වොයේජ් ෆ්ලුවියල් ඩු ටයිටෙල් අමසෝන් Voyage fluvial du Tieté à l’Amazone හි ප්‍රකාශයට පත් කළේය.

ගවේෂණය අවසන් වූ විගසම, 1830 දී ෆ්ලෝරන්ස් හි ඔහුගේ මිතුරෙකු හා ප්‍රතිලාභියෙකු වූ ෆ්‍රැන්සිස්කෝ ඇල්වාරෙස් මචාඩෝගේ දියණිය වන මාරියා ඇන්ජලීකා ඩි වාස්කොන්සෙලෝස් සමඟ විවාහ වූ අතර ඇය සමඟ කැම්පිනස් නගරයේ (එවකට විලා ඩි සාඕ කාලෝස් ලෙස නම් කරන ලදී) සාඕ පාවුලෝ ප්‍රදේශයේ පදිංචි විය. එහිදී ඔහු සාර්ථක ගොවියෙකු, ප්‍රකාශකයෙකු සහ නගරයේ පළමු මුද්‍රණ යන්ත්‍රයේ හිමිකරුවෙකු බවට පත් විය. ඔහු 1879 දී මිය යන තෙක් ම අවුරුදු 49 කැම්පිනස්හි ජීවත් විය. 1850 දී මාරියා මිය ගියාය. ඉන් වසර හතරකට පසු ඔහු 1828 දී කැසෙල්හි උපත ලැබූ ජර්මානු සංක්‍රමණිකයෙකු වන කැරොලිනා කෘග් සමඟ විවාහ විය. ඔවුන් දෙදෙනා එක්ව 1863 දී ගැහැණු ළමයින් සඳහා පාසලක් වන ෆ්ලෝරන්ස් විද්‍යාලය ආරම්භ කරන ලද අතර එය හර්කියුලිස්ගේ මරණයෙන් පසු ජුන්ඩියායි වෙත ගෙන යන ලදී. ඒ වනවිට හර්කියුලිස් දරුවන් 20 දෙනෙකුගේ පියෙකු විය. ඒ මරියා ඇන්ජලීකාගෙන් 13 ක් සහ කැරොලිනාගෙන් 7 ක් වශයෙනි.

කැම්පිනස් හි පදිංචි වූ විගසම, හර්කියුලිස් ෆ්ලෝරන්ස් නව නිපැයුම්කරුවෙකු සහ ව්‍යාපාරිකයෙකු ලෙස හොඳ වෘත්තියක් ආරම්භ කළේය. ලැන්ග්ස්ඩෝෆ් ගවේෂණයේදී ඔහු කුරුල්ලන්ගේ ගීත සහ වෙනත් සතුන්ගේ හඬ පටිගත කිරීම සඳහා සංගීත අංකනය භාවිතා කිරීමේ නව ක්‍රමයක් සකස් කර ඇති අතර එයට ඔහු “සූෆෝනියා (zoophonia) ” යන නම තැබීය. 1830 දී, ඔහු ලැන්ග්ස්ඩෝෆ් ගවේෂණයේදී සිදු කරන ලද නිදර්ශන 200 කට වඩා මුද්‍රණය කිරීමේ සරල ක්‍රමයක් සොයමින් සිටියදී, ලී සහ ලෝහ (සයිලෝග්‍රැෆි සහ ලිතෝග්‍රැෆි) මත මිල අධික හා කාලය වැය කරන කැටයම් භාවිතා කිරීම හැරුණු විට ඔහු නව ක්‍රියාවලියක් නිර්මාණය කළේය. ඔහු “පොලිග්‍රැෆියා” ලෙස නම් කළ එය මයිමොග්‍රැෆි වලට සමාන වන අතර, මෙය ඔහුගේ මුද්‍රණ කාර්යාලයේ වාණිජමය වශයෙන් භාවිතා කිරීමට පටන් ගත්තේය. ඔහුගේ තාක්‍ෂණය පරිණාමය වන විට, වර්ණ සංයෝජනය කිරීමටත්, ගණනය කළ නොහැකි තරම් වූ බැංකු නෝට්ටු නිෂ්පාදනය කිරීමටත් ඔහුට හැකි විය.

1832 දී, ඖෂධවේදී මිතුරෙකු වන ජොකීම් කොරියා ඩි මෙලෝගේ සහාය ඇතිව, ෆ්ලෝරන්ස් කැමරාවේ අපැහැදිලි රූප ස්ථිරවම සවි කිරීමේ ක්‍රම අධ්‍යයනය කිරීමට පටන් ගත් අතර, ඔහු එය “ෆොටෝෆියා” ලෙස නම් කළේය. 1833 දී ඔවුන් කඩදාසි මත රිදී නයිට්රේට් ආලේපණය ස්ථිර කළ අතර, එය 1800 දී පමණ තෝමස් වෙජ්වුඩ් විසින් අත්හදා බැලීම් වලට භාජනය කළ ක්‍රමයක් විය. සැබෑ ලෝකයේ දර්ශනවල ඡායාරූප ගැනීමට හෝ එම ඡායාරූප ලබා දීමට නොහැකි වූ වෙජ්වුඩ් ක්‍රමය මෙන් නොව, ෆ්ලෝරන්ස්ගේ ක්‍රමය වඩා සාර්ථක විය. ඔහු එය සැහැල්ලුවෙන් සහ වේගයෙන් වැඩිදියුණු කළ අතර ෆ්ලෝරන්ස්ගේ සටහන් පොත් වලින් පෙනී යන්නේ අවසානයේ දී ඔහු ඒ දෙකම කිරීමට සමත් වූ බවයි. අවාසනාවකට මෙන්, ඔහු කිසි විටෙකත් ඔහුගේ නව නිපැයුම් ප්‍රමාණවත් ලෙස ප්‍රකාශයට පත් නොකළ නිසාත්, ඔහු දුරස්ථ හා නොදියුණු පළාතක ජීවත් වන අපැහැදිලි නව නිපැයුම්කරුවෙකු වූ නිසාත්, හර්කියුලිස් ෆ්ලෝරන්ස් ඡායාරූපකරණයේ නව නිපැයුම් කරුවෙකු ලෙස ජාත්‍යන්තරව පිළිගැනීමට ලක් නොවීය.

1833 දී බ්‍රසීලයේ කැම්පිනස් හි හර්කියුලිස් ෆ්ලෝරන්ස් විසින් නිෂ්පාදනය කරන ලද එප්‍රීව් එන් 2 Epréuve Nº2 (photographie), (ඡායාරූප ශිල්පී) නම් වූ ඹෟෂධීය බෝතල් ලේබල් කිහිපයක ඡායාරූප රූපයක්, දැනට සාඕ පවුලෝ බ්‍රසීලයේ ඉන්ස්ටිටියුටෝ මොරෙයිරා සාලෙස් (අයිඑම්එස්) [Instituto Moreira Salles (IMS)] එකතුවෙහි ඇත. අයිඑම්එස් ආයතනය විසින් 2002 දී පේද්‍රෝ කොරියා ඩෝ ලාගෝ (Pedro Corrêa do Lago) එකතුවෙන් අත්පත් කර ගන්නා ලද තොරතුරු ඇසුරෙන් ෆ්ලෝරන්ස් ක්‍රමය හඳුන්වන්නේ “ඇමරිකානු මහාද්වීපයේ පවතින, රිදී ලවණ ආලෝකයට දක්වන සංවේදීතාව මත පදනම්ව පැරණිම ඡායාරූප වාර්තාව“ ලෙස ය. [ෆ්ලෝරන්ස්ගේ ඡායාරූප තාක්‍ෂණය භාවිතයෙන් සාදන ලද ඩිප්ලෝමාවක ඡායා පිටපත, 1839]